راولپنڈی (آئی آر کے نیوز): پاکستان تحریک انصاف کے بانی عمران خان سے اڈیالا جیل میں وزیراعلیٰ خیبرپختونخوا کے مشیر برائے اطلاعات بیرسٹرمحمد علی سیف کی ملاقات کی اندرونی کہانی سامنے آگئی۔
تفصیلات کے مطابق نجی ٹی وی چینل "جیو نیوز" نے اپنی رپورٹ میں ذرائع کے حوالے سے دعویٰ کیا ہے کہ ملاقات میں اسٹیبلشمنٹ سے بات چیت پر اب تک کی پیش رفت پرگفتگو ہوئی اور بیرسٹرسیف نے عمران خان کو اسٹیبلشمنٹ سے بات نہ بننےکی وجوہات بتائیں۔
ذرائع کا کہنا ہے کہ اسٹیبلشمنٹ کے ساتھ بات چیت کیلئے وفاقی حکومت کے ساتھ بیٹھک ضروری ہے۔
ذرائع کے مطابق عمران خان نے بیرسٹرسیف کو اسٹیبلشمنٹ سے رابطے جاری رکھنے کی ہدایت کی۔
ذرائع نے بتایاکہ ملاقات میں بیرسٹرسیف پر سوشل میڈیا پر پارٹی رہنماؤں کے اعتراضات بھی زیربحث آئے تاہم عمران خان نے بیرسٹرسیف پراعتماد کا اظہار کیا اور کام جاری رکھنے کی ہدایت کی۔
ذرائع کے مطابق بیرسٹرسیف اور بانی پی ٹی آئی کی ملاقات میں دہشتگردی اور افغانستان کےساتھ بات چیت پر گفتگو ہوئی اور عمران خان نے امن و امان کےحوالے سے افغانستان سے مذاکرات ناگزیر قراردیے۔
جیونیوز سے گفتگو میں مشیراطلاعات خیبرپختونخوا بیرسٹرمحمد علی سیف کا کہنا تھاکہ بانی پی ٹی آئی سے مختلف امور پر گفتگو ہوئی جس میں مذاکرات اور پارٹی کے معاملات زیربحث آئے۔
یہاں خیال رہے کہ چند روز قبل مشیراطلاعات کے پی بیرسٹر محمد علی
سیف کی بانی پی ٹی آئی سے ملاقات ہوئی تھی۔