حال ہی میں سوشل میڈیا پر جیا بچن کی ایک پرانی وڈیو وائرل ہورہی ہے
جس میں وہ ایشوریا رائے کواپنے خاندان کا حصہ بننے پر مبارکباد دے رہی ہیں۔
تفصیلات کے مطابق بالی ووڈ سپر اسٹار امیتابھ بچن کی اہلیہ جیا بچن کی
ایک پرانی ویڈیو سوشل میڈیا پر وائرل ہو رہی ہے جس میں وہ اپنی بہو ایشوریا رائے
کو خاندان میں خوش آمدید کہتی ہیں جس پر ایشوریا رائے اپنے جذبات پر قابو نہ رکھ
سکیں۔
جیا بچن نے اسٹیج پر کھڑے ہو کر کہا کہ آج میں ایک بار پھر پیاری سی
لڑکی کی ساس بننے جا رہی ہوں جو بہت باوقار ہے اور جس کی مسکراہٹ بہت دلنشین ہے،
انہوں نے اداکارہ سے کہا کہ میں آپ کو اپنے خاندان میں خوش آمدید کہتی ہوں اور
آپ سے بہت محبت کرتی ہوں۔
یہ سن کر ایشوریا رائے اپنے جذبات پر قابو نہ رکھ سکیں اور ان کی
آنکھوں سے آنسو نکل آئے۔ واضح رہے کہ یہ ویڈیو 2007 کے فلم فیئر لائف ٹائم اچیومنٹ
ایوارڈ تقریب کی ہے، جہاں جیا بچن کو ان کی فنی خدمات پر ایوارڈ دیا گیا تھا۔
یہ پہلا موقع نہیں تھا جب جیا بچن نے ایشوریا کی تعریف کی ہو، اس سے
قبل ایک انٹرویو میں جب ان سے پوچھا گیا کہ کیا ایشوریا ان کے خاندان کے لیے صحیح
انتخاب ہیں تو ان کا کہنا تھا کہ ’ایشوریا بہت شاندار ہیں۔ وہ خود بھی ایک بڑی
اسٹار ہیں۔ لیکن جب ہم سب اکٹھے ہوتے ہیں تو میں نے کبھی نہیں دیکھا کہ وہ خود کو
آگے بڑھاتے ہوئے نظر آئیں، مجھے یہ خصوصیت پسند ہے کہ وہ پیچھے رہتی ہیں، خاموش
رہتی ہیں اور سب کچھ سنتی ہیں اور سیکھتی ہیں‘۔
انہوں نے مزید کہا، ’ایک اور خوبصورت بات یہ ہے کہ ایشوریا ان کے
خاندان میں اچھی طرح سے ڈھل گئی ہیں۔ وہ جانتی ہیں کہ یہ خاندان ہے، یہ اچھے دوست
ہیں، اور یہی طریقہ ہونا چاہیے۔ مجھے لگتا ہے کہ وہ ایک مضبوط خاتون ہیں‘۔
واضح رہے کہ بالی ووڈ کی مقبول جوڑی ایشوریا رائے اور ابھیشیک بچن
2007ء میں شادی کے بندھن میں بندھے تھے اور 2011ء میں ان کی بیٹی آرادھیا کی
پیدائش ہوئی۔ اس جوڑے میں علیحدگی کی خبریں کافی عرصے سے گردش میں ہیں لیکن
ایشوریہ یا ابھیشک کی جانب سے ایسی خبروں کی تردید یا تصدیق نہیں کی گئی۔