عمر کوٹ (آئی آر کے نیوز): قومی اسمبلی کے حلقہ 213 کے ضمنی انتخاب میں پیپلز پارٹی کی امیدوار صبا تالپور بھاری اکثریت سے کامیاب ہوگئیں جبکہ آزاد امیدوار لال چند مالھی دوسرے نمبر پر رہے۔
تفصیلات کے مطابق این اے 213 عمر کوٹ میں ضمنی انتخاب کیلئے پولنگ کا آغاز جمعرات کی صبح 8 بجے ہوا جو شام 5 بجے تک بلاتعطل جاری رہا۔
حلقے میں مجموعی طور پر 18امیدوار مد مقابل تھے، ضمنی انتخاب میں پیپلزپارٹی کی امیدوار صبا تالپور اور جی ڈے اے کے حمایت یافتہ امیدوار لال چند مالھی میں سخت مقابلہ متوقع تھا۔
عمرکوٹ کے این اے 213 پر ضمنی انتخابات میں تمام 498 پولنگ اسٹیشنز کے غیر حتمی و غیر سرکاری نتائج آگئے جس کے مطابق پیپلز پارٹی کی صبا تالپور ایک لاکھ 61 ہزار 934 ووٹ لے کر کامیاب ہوگئیں۔
غیر سرکاری نتیجے کے مطابق آزاد امیدوار لال چند 81 ہزار 160 ووٹ لےکر دوسرے نمبر پر رہے۔
آزاد امیدوارلال چند نے نتائج مستردکردیے اور ڈی آر او آفس کے سامنے دھرنا دیا جبکہ مشتعل افراد نے ٹائروں کو آگ لگاکر سڑک بلاک کر دی اور آج ہڑتال کا اعلان کیا گیا۔
واضح رہے کہ این اے 213 عمر کوٹ کی نشست پیپلزپارٹی کے رہنما نواب یوسف تالپور کے انتقال کے بعد خالی ہوئی تھی۔
دوسری جانب، چیئرمین پیپلزپارٹی بلاول بھٹوزرداری نےعمرکوٹ کے ضمنی الیکشن کے نتائج پر ردعمل دیتے ہوئے کہا کہ کامیابی جیالوں کی محنت کا نتیجہ ہے۔
بلاول بھٹو نے کہا کہ عوام کےاعتماد کامظہرہے،صبا تالپور کی کامیابی جمہوریت کی فتح ہے، آج حیدرآباد میں این اے213 کی کامیابی کا جشن منائیں گے۔