اسلام آباد (آئی آر کے نیوز): اکوڑہ خٹک دھماکے کے بعد خیبر پختونخوا حکومت نے وفاق سے افغانستان سے بات چیت سے متعلق ٹرمز آف ریفرنسز (ٹی او آرز) جلد از جلد منظور کرنے کا مطالبہ کردیا۔
تفصیلات کے مطابق اس حوالے سے ترجمان خیبرپختونخوا حکومت بیرسٹر محمد سیف نے اپنے بیان میں کہا ہے کہ وفاق ٹی او آرز کی منظوری میں مزید تاخیر سے گریز کرے، خیبر پختونخوا حکومت ہنگامی بنیادوں پر وفد افغانستان بھیجنا چاہتی ہے، اپنے عوام کے جان و مال کی حفاظت خیبر پختونخوا حکومت کی اولین ترجیح اور ذمہ داری ہے۔
انہوں نے کہا کہ وزیراعلیٰ پنجاب مریم نواز بھارت سے اسموگ ڈپلومیسی کر سکتی ہیں تو دہشت گردی جیسے اہم مسئلے پر خیبر پختونخوا حکومت کی افغانستان سے بات چیت میں کیا حرج ہے؟ وفاق کی اس دوغلی پالیسی سے صوبے کی احساس محرومی مزید بڑھ رہی ہے۔
ترجمان خیبرپختوانخواہ حکومت کی جانب سے مطالبہ کیا گیا کہ وفاق افغانستان سے بات چیت کیلئے خیبر پختونخوا حکومت کے ٹی او آرز جلد از جلد منظور کرے۔