یوکرین نے روس کے دارالحکومت ماسکو پر جنگ کے آغاز کے بعد سب سے بڑے ڈرون حملے کیے ہیں، جن میں کم از کم ایک شخص ہلاک ہو گیا جبکہ کئی عمارتوں میں آگ لگ گئی اور فضائی و ٹرین سروسز معطل ہوگئیں۔
خبر رساں ادارے رائٹرزنے رپورٹ کیا ہے ماسکو کے گورنر آندرے
ووروبائیوف نے میسجنگ ایپ ٹیلی گرام پر ایک پوسٹ میں کہاکہ ’آج صبح 4 بجے ماسکو
شہر اور خطے پر ایک بڑا ڈرون حملہ کیا گیا، فی الحال ایک شخص کی موت اور 3 کے زخمی
ہونے کی اطلاع ہے‘۔
ماسکو کے میئر سرگئی سوبیانن نے کہا کہ کم از کم 69 ڈرون تباہ ہوئے جو
کئی مراحل میں شہر کے قریب پہنچے تھے۔
یہاں یہ بھی واضح رہے کہ ماسکو اور اس کے آس پاس کا علاقہ کم از کم 2
کروڑ10 لاکھ آبادی کے ساتھ ، استنبول کے ساتھ ساتھ یورپ کے سب سے بڑے شہروں میں سے
ایک ہے۔
روس کے ایوی ایشن واچ ڈاگ کا کہنا ہے کہ ان حملوں کی وجہ سے ماسکو کی
جانب آنے والی تمام فلائٹس معطل کردی گئی ہیں۔
میڈیا رپورٹس میں بتایا گیا ہے کہ ماسکو کے مشرق میں یاروسلاول اور
نزنی نووگورود کے علاقوں میں 2 دیگر ہوائی اڈے بھی بند کر دیے گئے ہیں۔
ماسکو کے گورنر نے مزید بتایا کہ کریملن سے تقریباً 50 کلومیٹر جنوب
مشرق میں خطہ ماسکو کے ضلع رامینسکوئے میں ایک کثیر المنزلہ عمارت میں کم از کم
سات اپارٹمنٹس کو نقصان پہنچا ہے اور رہائشیوں کو نقل مکانی پر مجبور ہونا پڑا ہے۔
خبر رساں ادارے آر آئی اے کے مطابق ماسکو سے تقریباً 35 کلومیٹر جنوب
میں واقع ضلع ڈومودیدوو میں ریلوے اسٹیشن پر ڈرون کا ملبہ گرنے کے نتیجے میں ریلوے
کے بنیادی ڈھانچے کو نقصان پہنچا ہے اور وہاں بھی فی الحال سفر روک دیا گیا ہے۔
روس کی سکیورٹی سروسز سے قریب سمجھے جانے والے نیوز ٹیلی گرام چینل
بازا اور دیگر روسی نیوز ٹیلی گرام چینلز نے ماسکو کے ارد گرد متعدد رہائشی
عمارتوں میں آگ لگنے کی ویڈیوز پوسٹ کیں جن کے بارے میں ان کا کہنا تھا کہ آگ لگنے
کے واقعات حملوں کی وجہ سے پیش آئے تھے۔
واضح رہے کہ یہ حملے ایک ایسے وقت میں کیے گئے ہیں جب امریکا اس 3
سالہ جنگ کے خاتمے پر زور دے رہا ہے جو فروری 2022 میں روس کے یوکرین پر حملے کے
بعد شروع ہوئی تھی۔ ماہرین کا کہنا ہے کہ اس حملے کے بعد یوکرین کو امریکہ کی جانب
سے سخت ردعمل کا سامنا کرنا پڑسکتا ہے۔
یاد رہے کہ ماسکو خطے کے جنوب مشرق میں واقع ریازان خطے اور یوکرین کی
سرحد پر واقع بیلگورود کے علاقے کے گورنروں نے بھی کہا کہ ان کے علاقے ڈرون حملوں
کی زد میں ہیں۔ علاقائی گورنر نے کہا کہ بیلگورود کے علاقے میں متعدد بستیاں بجلی
سے محروم ہیں۔
نومبر میں بھی ماسکو پر اس وقت تک کے سب سے بڑے ڈرون حملے کیے گئے تھے
جن میں کم از کم 34 ڈرونز کو تباہ کیا گیا تھا، ان حملوں میں دارالحکومت کے ارد
گرد کم از کم ایک شہری ہلاک اور درجنوں مکانات تباہ ہو گئے تھے۔
یوکرینی حکام اکثر یہ کہتے رہے ہیں کہ اس کے حملوں کا مقصد ماسکو کی
مجموعی جنگی تیاریوں کے بنیادی ڈھانچے کو تباہ کرنا ہے اور یہ یوکرین پر روس کی
مسلسل بمباری کا جواب میں ہے۔
دونوں فریق حملوں میں عام شہریوں کو نشانہ بنانے سے انکار کرتے ہیں،
لیکن ان میں سے اب تک ہزاروں افراد اس تنازع میں ہلاک ہو چکے ہیں، جن میں سے
اکثریت یوکرینی شہریوں کی ہے۔