اسلام آباد (آئی آر کے نیوز): پارلیمانی سال کے آغاز پر پارلیمنٹ کا مشترکہ اجلاس ہوا، جس سے صدر مملکت آصف علی زرداری نے خطاب کیا۔
تفصیلات کے مطابق پارلیمنٹ کا مشترکہ اجلاس اسپیکر قومی اسمبلی سردار ایاز صادق کی سربراہی میں ہوا، اجلاس کا باقاعدہ آغاز قومی ترانے کے بعد تلاوت کلام پاک سے ہوا جس کے بعد نعت رسول مقبول ﷺ پیش کی گئی۔
تلاوت کلام پاک اور نعت رسول ﷺ ختم ہوتے ہی اسپیکر قومی اسمبلی نے صدر آصف علی زرداری کو خطاب کی دعوت دی تو اپوزیشن نے شدید نعرے بازی اور شور شرابہ شروع کردیا۔
صدر مملکت آصف علی زرداری کا خطاب شروع ہوتے ہی پی ٹی آئی ارکان نے ڈیسک بجا کر احتجاج شروع کردیا، شدید نعرے بازی کے باعث صدر نے کانوں پر ہیڈفون لگالیے، صدر زرداری اپنے خطاب میں حکومت کی ایک سالہ کارکردگی پراظہارخیال کیا۔
صدر مملکت نے کہا کہ پارلیمنٹ کے مشترکہ اجلاس سے خطاب کرنا میرے لیے باعث فخر ہے، ہمیں پاکستان کے بہتر مستقبل کے لیے عزم کے ساتھ کام کرنا ہے، ملک کو یکجہتی اور سیاسی استحکام کی ضرورت ہے۔
صدر نے مزید کہا کہ ملک کی معیشت مستحکم ہوئی ہے، اب ہمیں عوامی خدمت کے شعبے پر بھرپور توجہ دینی ہے، ہمیں پسماندہ علاقوں کی ترقی پر بھرپور توجہ دینی ہے۔
صدر نے مزید کہا کہ ہمیں ملک میں گڈ گورننس اور سیاسی استحکام کو فروغ دینا ہے، ٹیکس کے نظام میں مزید بہتر لانی ہوگی، عوام نے پارلیمان سے امیدیں وابستہ کررکھی ہیں، ہمیں عوام کی امیدوں پر پورا اترنا ہوگا۔
یہاں یہ بھی خیال رہے کہ اجلاس میں وزیراعظم شہباز شریف کے علاوہ ترکی، متحدہ عرب امارات، آذربائیجان، فلسطین، جرمنی، فرانس اور عراق کے سفیر بھی اجلاس میں شریک ہوئے۔
وزیراعلیٰ سندھ مراد علی شاہ اور وزیراعلیٰ بلوچسستان سرفراز بگٹی بھی پارلیمنٹ میں موجود تھے، اسپیکر پنجاب اسمبلی ملک احمد خان بھی مہمانوں کی گیلری میں موجود تھے۔