آئی سی سی چیمپئنز ٹرافی کے بعد بھارتی میڈیا نے پاکستان کرکٹ کو
بدنام کرنے کی مہم شروع کردی۔
تفصیلات کے مطابق پاکستان کرکٹ بورڈ نے بھارتی میڈیا میں شائع ہونے
والی خبر کو من گھڑت ، بے بنیاد اور حقائق کے منافی قرار دیا ہے۔
ترجمان پی سی بی کی جانب سے کہا گیا ہے کہ بھارتی میڈیا بغیر ثبوت اور
تحقیق کے جھوٹی خبریں چلا رہا ہے۔ بھارت کا یہ پراپیگنڈی سراسر جھوٹ پر مبنی ہے
کیونکہ بھارتی میڈیا قومی ٹی ٹوئنٹی ٹورنامنٹ میں کھلاڑیوں کی میچ فیس کو کم کرنے
سے اس کہانی کو جوڑ رہا ہے۔
انہوں نے مزید کہا کہ چیمپئنز ٹرافی سے پی سی بی کو کوئی نقصان نہیں
ہوا، ہمیں 6 ملین ڈالرز میزبانی پر ملیں گے اورگیٹ منی سے آمدنی کا فیصلہ کچھ ماہ
میں آڈٹ کے بعد ہوگا جب کہ ہوٹلوں کا کرایہ، جہازوں کے ٹکٹ، پرائز منی اور دیگر
اخراجات آئی سی سی ادا کرے گا۔
یہاں یہ بات واضح رہے کہ بھارتی میڈیا کی رپورٹ کے مطابق پاکستان کرکٹ
بورڈ کو آئی سی سی چیمپئنز ٹرافی 2025کی میزبانی کے دوران 869کروڑ روپے(85 ملین ڈالر) کا نقصان ہوا جس کے
بعد بورڈ نے کھلاڑیوں کی میچ فیس میں کٹوتی اور 5 اسٹار ہوٹلوں کی سہولت ختم کرنے
جیسے سخت اقدامات اٹھائے ہیں۔