لاہور (آئی آر کے نیوز): پاکستان کرکٹ ٹیم کے کھلاڑیوں کو ہوم اینڈ اوے سیریز میں کوڈ آف کنڈکٹ کی خلاف ورزی پر جرمانے کردئیے گئے۔
اس حوالے سے میڈیا رپورٹس میں بتایا گیا ہے کہ انگلینڈ کے خلاف ہوم سیریز سے جنوبی افریقا کے خلاف سیریز تک 30 لاکھ روپے سے زیادہ جرمانے کیے گئے ہیں جبکہ سب سے زیادہ جرمانہ آل راؤنڈر عامر جمال کو ہوا۔
آل راؤنڈر عامر جمال نے انگلینڈ کے خلاف سیریز میں انٹرویو کے دوران ایسا ہیٹ پہنا جس پر سیاسی نعرہ درج تھا اور عامر جمال کو تقریباً 13 لاکھ روپے جرمانے کا سامنا کرنا پڑا۔
جیو نیوز کے مطابق پی سی بی کا کہنا ہے کہ ڈسلپنری معاملات کرکٹ بورڈ کا اندرونی معاملہ ہے، دنیا بھر کی طرح پی سی بی بھی ایسے معاملات پبلک نہیں کرتا کیونکہ ایسا کرنے سے کھلاڑیوں کی ساکھ متاثر ہوتی ہے اس لیے کرکٹ بورڈ اس حوالے سے کوئی تبصرہ نہیں کرتا۔
مزید برآں، آسٹریلیا میں سیریز کے دوران تین کرکٹرز کو ہوٹل تاخیر سے واپسی پر پانچ پانچ لاکھ روپے جرمانہ ہوا جبکہ جنوبی افریقا میں بھی چار کرکٹرز کو کرفیو کی خلاف ورزی پر جرمانہ ہوا تھا، سلمان علی آغا، عبداللہ شفیق، صائم ایوب اور عباس آفریدی سمیت کرکٹرز کو جرمانہ ہوئے۔