معروف اداکارہ و ماڈل فضا علی نے نجی ٹی وی چینل پر رمضان ٹرانسمیشن
کے دوران گفتگو کرتے ہوئے 4 شادیوں کے شوقین حضرات کو شدید تنقید کا نشانہ بنا ڈالا
جس کے بعد ان کی وڈیو سوشل میڈیا پر وائرل ہوگئی اور لوگوں کی جانب سے ان کے اس
بیان پر ملا جلا ردعمل دیا گیا۔
تفصیلات کے مطابق پاکستانی اداکارہ فضا علی نے کہا کہ اسلام میں مرد
کو 4 شادیوں کی اجازت ہے، انہیں 4 شادیاں کرنے کا حکم نہیں دیا گیا۔ اور ایسی
عورتوں کو اپنانے کا کہا گیا ہے جو یتیم ہیں، مسکین ہیں، بے سہارا ہیں، بیوہ ہیں
یا طلاق یافتہ ہیں تاکہ ان خواتین کو سہارا مل سکے اور ان کے لیے گھر کا انتظام ہو
سکے۔
اداکارہ نے کہا کہ بہت سارے مرد اپنی زیادہ شادیوں کو فخریہ پیش کرتے
ہیں اور اس بات کا دعویٰ کرتے ہیں کہ انہوں نے سب بیویوں کو خوش رکھا ہوا ہے۔
ادکارہ نے کہا کہ ایسے مردوں کے دعوے زیادہ تر جھوٹے ہوتےہیں کیونکہ انہوں نے محظ
اپنی عیاشیوں کے لیے زیادہ شادیاں کی ہوتی ہیں۔
فضا علی نے ایسے مردوں کے بارے میں بات کرتے ہوئے مزید کہا کہ "
کیا آم کا درخت لگا ہوا ہے کیا کہ 4,4 شادیاں کریں گے؟ کیوں مرد 4 شادیاں کریں
گے؟ مرد حضرات پہلی بیوی کو طلاق دے کر پھر دوسری شادی کریں۔" انہوں نے مشورہ
دیا کہ مرد ایک ہی شادی کرے اور ایک بیوی کو خوش رکھے۔
انہوں نے مزید کہا کہ اگر کوئی بیوہ یا طلاق یافتہ عورت کا سہارا بننے
کے لیے دوسری شادی کرتا ہے تو ٹھیک ہے، ورنہ عیاشی کے چکر میں دوسری شادی نہ کریں۔