لاہور (آئی آر کے نیوز): بانی پاکستان تحریک انصاف (پی ٹی آئی) اور سابق وزیراعظم عمران خان نے 9 مئی کے 8 مقدمات میں درخواست ضمانتوں کی جلد سماعت کے لیے لاہور ہائیکورٹ سے رجوع کرلیا۔
تفصیلات کے مطابق عمران خان نے اپنے وکیل بیرسٹر سلمان صفدر کی وساطت سے جناح ہاؤس حملہ کیس و دیگر مقدمات میں متفرق درخواستیں دائر کیں۔
سابق وزیراعظم عمران خان نے درخواست میں مؤقف اپنایا کہ سیاسی انتقام کے لیے سازش کا الزام لگا کر مقدمات میں نامزد کیا گیا ہے، 8 مقدمات میں ضمانت کے لیے ہائیکورٹ سے رجوع کیا جس پر 16 جنوری کو سماعت ہوئی تھی۔
درخواست میں کہا گیا ہے کہ پولیس کو نوٹس جاری ہونے کے بعد درخواست ضمانتیں سماعت کے لیے مقرر نہیں ہوئیں۔
استدعا کی گئی ہے کہ عمران خان کی ضمانت کی درخواستوں کو فوری طور پر سماعت کے لیے مقرر ہونا چاہیے، متفقہ قانون ہے کہ نہ صرف انصاف ہونا چاہیے بلکہ ہوتا ہوا نظر بھی آنا چاہیے۔ عدالت 9 مئی کے 8 مقدمات میں درخواست ضمانتوں کو جلد سماعت کے لیے مقرر کرے۔