اسلام آباد (آئی آر کے نیوز): فری اینڈ فیئر الیکشن نیٹ ورک (فافن) نے وفاق کے مقابلے میں پنجاب کی حکومت کو شفاف قرار دے دیا۔
تفصیلات کے مطابق فافن کی 2025 کی رپورٹ شائع کردی گئی ہے۔ فافن نے پنجاب میں اداروں کی کارکردگی کی شفافیت کی سطح پر مبنی رپورٹ پیش کی ہے اور رپورٹ میں 253 سرکاری اداروں کا احاطہ کیا گیا ہے۔
رپورٹ کے مطابق پنجاب سیکریٹریٹ کے 43 محکموں، 27 منسلک محکموں، 147 خود مختار اداروں، 23 سرکاری کمپنیوں اور 13 اداروں کا جائزہ لیا گیا۔
فافن کی رپورٹ کے مطابق وفاقی وزارتیں اوسطاً 42 فیصد معلومات کا انکشاف کر رہی ہیں اور پنجاب حکومت کی شفافیت کی سطح وفاقی حکومت سے بہتر ہے۔
رپورٹ میں کہا گیا ہے کہ قانونی تقاضوں کے مطابق پنجاب کے اداروں کی فعال طور پر 61 فیصد معلومات دستیاب ہیں اور پنجاب میں ذیلی ادارے 52 فیصد تک معلومات ویب سائٹس پر مہیا کر رہے ہیں۔