واشنگٹن: امریکی صدر ڈونلڈ ٹرمپ نے 'ٹرمپ
غزہ' کے عنوان سے ایک اے آئی ویڈیو شیئر کردی جس پر سوشل میڈیا صارفین نے
شدید ردعمل کا اظہار کیا ہے۔ ٹرمپ کے مسلمان حامیوں نے انکو آڑے ہاتھوں لیا ہے۔
میڈیا رپورٹس کے مطابق اس وڈیو میں غزہ کو
ایک "ریسورٹ" میں بدلتا ہوا دکھایا گیا ہے جہاں ایلون مسک ساحل پر بیٹھے
نوٹ برسا رہے ہیں۔ اس وڈیو پر ٹرمپ کے اپنے حامیوں نے بھی ان پر تنقید کی ہے۔
واضح رہے کہ اس ویڈیو میں نائٹ کلبز، پارٹیوں
اور ہوٹلوں کی تصاویر دکھائی گئی ہیں، جبکہ ایک عظیم الجثہ سنہری مجسمہ ٹرمپ کے
’نجات دہندہ‘ ہونے کا تاثر دیتا ہے۔
’ٹرمپ غزہ’ کے نام سے ایک ہوٹل، بچوں کے ہاتھ میں ٹرمپ کے
چہرے والے سنہری غبارے، اور دکانوں میں ٹرمپ کے سنہری مجسمے بھی ویڈیو کا حصہ ہیں۔
حیران کن طور پراس ویڈیو میں ٹرمپ نے داڑھی
والی رقاصائیں بھی شامل کروائی ہیں، جو خود ٹرمپ کی اینٹی-ٹرانس پالیسیوں کے بالکل
برعکس ہے۔
صارفین نے ویڈیو کو "گھناؤنا اور
شرمناک" قرار دیا۔ ایک انسٹاگرام صارف نے لکھا: "غزہ فلسطینیوں کا ہے،
ٹرمپ کی خیالی جنت نہیں۔‘‘
سوشل میڈیا صارفین نے اسے نازی نظریے کی علامت قرار دیا اور فلسطینیوں کے قتل عام کے دوران اس طرح کی مضحکہ خیز پروپیگنڈہ ویڈیو کو سنگدلی سے تعبیر کیا۔