پشاور (آئی آر کے نیوز): مشیر اطلاعات خیبر پختونخوا بیرسٹر سیف کا اپنے بیان میں کہنا ہے کہ لاہور اور اسلام آباد ہائی کورٹ بار ایسوسی ایشن کے انتخابات میں جیت دراصل عمران خان کے نظریے کی فتح ہے۔
تفصیلات کے مطابق بیرسٹر ڈاکٹر سیف نے اپنے حالیہ بیان میں کہا ہے کہ انتخابات میں کامیابی کے بعد جعلی حکومت کی بنیادیں ہل چکی ہیں اور کانپیں ٹانگ رہی ہے، دونوں ہائی کورٹس کے نو منتخب صدور کو دل کی گہرائیوں سے مبارکباد پیش کرتا ہوں۔
بیرسٹر ڈاکٹر سیف نے کہا امید ہے کہ وکلاء کی نومنتخب قیادت آئین کی بحالی اور قانون کی حکمرانی کے لیے کلیدی کردار ادا کرے گی اور نومنتخب قیادت عمران خان سمیت تمام سیاسی قیدیوں کی رہائی میں اہم کردار ادا کرے گی۔
مشیر اطلاعات کا کہنا تھا کہ یہ الیکشن جعلی حکومت کے غیر قانونی اور اوچھے ہتھکنڈوں کے خلاف ریفرنڈم ثابت ہوا ہے۔
انہوں نے کہا کہ جعلی حکومت کو بار انتخابات میں فارم 47 کے ذریعے دھاندلی کا موقع نہیں ملا، شاندار کامیابی نے ثابت کر دیا کہ اس ملک کے حقیقی لیڈر عمران خان ہیں۔
یہاں یہ بھی خیال رہے کہ لاہور ہائیکورٹ بار ایسوسی ایشن کے سالانہ انتخابات میں حامد خان گروپ کے ملک آصف نسوانہ نے میدان مار لیا۔
ملک آصف نسوانہ نے 7 ہزار 50 ووٹ حاصل کرکے کامیابی حاصل کی جبکہ ان کے مدمقابل انڈیپنڈنٹ گروپ کے صدارتی امیدوار ثاقب اکرم گوندل 6 ہزار 4 سو 60 ووٹ حاصل کرسکے۔
نائب صدارت پر حامد خان گروپ کے عبدالرحمان رانجھا 8 ہزار 255 ووٹ لیکر منتخب ہوئے جبکہ ان کے مقابلے میں حسیب بن یوسف نے 4 ہزار 5 سو 3 ووٹ لئے ۔
سیکرٹری کی نشست پر سخت مقابلے کے بعد حامد خان گروپ کے فرخ الیاس چیمہ 6 ہزار 833 ووٹ لے کرسیکرٹری منتخب ہو گئے جبکہ ان کے مدمقابل قاسم اعجاز سمرا کو 6 ہزار 630 ووٹ ملے۔
فنانس سیکرٹری کے عہدے پر حام بن شعیب پہلے ہی بلا مقابلہ منتخب ہو چکےہیں جبکہ انتخابات میں 13 ہزار 6 سو 3 وکلاء نے رائے حق دہی استمال کیا۔
نتائج آنے کے بعد نومنتخب عہدیداروں کے حامیوں جیت کی خوشی میں نعرےبازی کی جبکہ ملک آصف نسوانہ نے کہا کہ آئین کی بالادستی اور 26 ترمیم کے خلاف جدوجہد جاری رکھی جائے گی۔
جبکہ دوسری جانب اسلام آباد ہائیکورٹ بار ایسوسی ایشن کے سالانہ انتخابات میں صدارت کی نشست پر واجد علی گیلانی 974 ووٹ لیکر جیت گئے جبکہ ان کے مدمقابل عبدالواحد قریشی 704 ووٹ لے سکے ہیں ۔
سیکریٹری جنرل کی نشست پر منظور احمد ججہ 844 ووٹ لے کر کامیاب ہوئے ہیں سیکرٹری کی نشت پر قاسم نواز عباسی 828 ووٹ لیکر دوسرے نمبر پر رہے ہیں ۔
نائب صدارت کی نشست پر افتحار احمد باجوہ 896 ووٹ لیکر کامیاب جبکہ راجہ منظر علی کیانی 673 ووٹ لیکر دوسرے نمبر پر رہے۔
ایڈیشنل سیکرٹری کی نشست پر بشریٰ حق راجہ 825 ووٹ لیکر کامیاب اور پلوشہ ایاز خان 815 ووٹ لیکر دوسرے نمبر پر رہی جوائنٹ سیکرٹری کی نشست پر عمران اشفاق 955 ووٹ لیکر جیت گئے جبکہ سید ظاہر شاہ 655 ووٹ لیکر ہار گئے۔
فنانس سیکرٹری کی نشت پر 966 ووٹ لیکر فضل مولا کامیاب، محسن عباسی 604 ووٹ لیکر دوسرے نمبر پر رہے بار الیکشن میں مجموعی طور پر 1718 ووٹ کاسٹ ہوئے۔