آئی سی سی چیمپئنز ٹرافی کیلئے بھارتی ٹیم کے پاکستان آنے سے انکار کے بعد اب بھارت کی ایشیا کپ کی میزبانی بھی خطرے میں پڑ گئی ہے۔ اب یہ ٹورنامنٹ متحدہ عرب امارات یا کسی اور نیوٹرل وینیو پر کروائے جانے کا امکان ہے۔
بھارتی میڈیا کی رپورٹ کے مطابق ایشیا کپ کا 17واں ایڈیشن رواں سال
ستمبرمیں ہونا ہے جس کی میزبانی بھارت کو ملی تھی۔ تاہم، اب ایشین کرکٹ کونسل
متحدہ عرب امارات سمیت کسی دوسرے وینیو پر یہ ٹورنامنٹ کروانے پر غور کررہی ہے جس
میں سری لنکا بھی شامل ہے۔
میڈیا رپورٹس میں مزید دعویٰ کیا گیا کہ اس ٹورنامنٹ کو ٹی20 فارمیٹ
پر کروایا جائے گا تاکہ 2026 میں ہونے والے ٹی20 ورلڈکپ کی تیاری ہوسکے۔
بھارت دفاعی چیمپئن کے طور پر اس ٹورنامنٹ میں حصہ لے گا۔ خیال رہے کہ پاکستان اور بھارت کو ایک گروپ میں شامل کیا جائے گا، اس
کے بعد سپر فور میں دوبارہ روایتی حریف آمنے سامنے آسکتے ہیں جب کہ سیمی فائنلز
جیتنے کی صورت میں بھی پاک بھارت میچ کا امکان موجود ہوگا۔
ایشین کرکٹ کونسل نے گزشتہ سال جولائی میں ایشیاکپ 2025 کی میزبانی
بھارت کو دی تھی جس کا مقصد 2026 میں بھارت میں ہی شیڈول ٹی20 ورلڈکپ کی تیاری
تھا۔
واضح رہے کہ بھارت نے آخری بار 1990-91 میں ایشیا کپ کی میزبانی کی
تھی جس میں بھارت نے فائنل میں سری لنکا کو شکست دی تھی۔
مجموعی طور پر اب تک 1984 سے شروع ہونے والے ایشیاکپ کے 16 ٹورنامنٹس
ہوچکے ہیں، جس میں سب سے زیادہ بھارت 8 بار چیمپئن بنا ہے، سری لنکا 6 اور پاکستان
صرف 2 بار یہ کپ جیتنے میں کامیاب رہا ہے، بنگلہ دیش 3 بار فائنل میں پہنچنے کے
باوجود ایک بار بھی ٹرافی نہیں اٹھاسکا۔