لاہور (آئی آر کے نیوز): مسلم لیگ ن کے صدر میاں نواز شریف سیاسی میدان میں متحرک ہوگئے ہیں۔
ڈان اخبار کے مطابق مسلم لیگ ن کے صدر میاں محمد نواز شریف نے ماڈل ٹاؤن میں اہم ملاقاتیں کی ہیں۔ رپورٹ میں بتایا گیا ہے کہ نوازشریف نے پارٹی کے سیکریٹری جنرل احسن اقبال، انجئینر امیر مقام، انوشہ رحمٰن، کیپٹن ریٹائرڈ صفدر سے ملاقاتیں کیں۔
بتایا گیا ہے کہ ملاقاتوں میں مسلم لیگ کے صوبائی سطح کے پارٹی معاملات پر مشاورت کی گئی، اس موقع پر میاں نواز شریف نے نارووال کے کامیاب جلسے کو سراہا۔ احسن اقبال نے اہم پارٹی امور پر میاں نواز شریف کو بریفنگ دی، اس موقع پر عید کے بعد مسلم لیگ ن کے زیر اہتمام مختلف شہروں میں مزید جلسوں پر مشاورت کی گئی۔
میاں نواز شریف نے پارٹی کو فعال کرنے کے لیے عوامی رابطہ مہم تیز کرنے کی ہدایت کرتے ہوئے کہا کہ مسلم لیگ ن کی ایک سالہ کارکردگی کو عوام کے سامنے رکھا جائے۔
یہاں یہ بھی واضح رہے کہ میاں نوازشریف سے گزشتہ دنوں میں مسلم لیگ (ن) کے پنجاب کے مختلف شہروں سے تعلق رکھنے والے ارکان اسمبلی نے ملاقاتیں کی ہیں۔