اسلام آباد (آئی آر کے نیوز): پاکستان کے چاند پر بھیجے جانے والے پہلے روور کا نام تجویز کرکے آپ ایک لاکھ روپے جیت سکتے ہیں۔
تفصیلات کے مطابق پاکستان کے قومی خلائی ادارے سپارکو نے اعلان کیا ہے کہ پاکستان کا چاند پر بھیجے جانے والا پہلا روور مشن 2028 میں روانہ کیا جائے گا۔
اس روور کا نام رکھنے کے لیے سپارکو کی جانب سے ایک ملک گیر مقابلے کا بھی اعلان کیا گیا ہے۔
اس مشن کے دوران پاکستانی روور چاند کے قطب جنوبی کی سطح کا تجزیہ کرے گا جبکہ مختلف سائنسی تجربات بھی کیے جائیں گے۔
سپارکو کے ترجمان کے مطابق عوام کو پاکستان کے پہلے چاند روور کا نام تجویز کرنے کی دعوت دی گئی ہے۔
ترجمان نے بتایا کہ روور کے لیے بہترین نام تجویز کرنے والے فرد کو ایک لاکھ روپے کا انعام دیا جائے گا۔
خیال رہے کہ کچھ عرصے قبل سپارکو کی جانب سے اعلان کیا گیا تھا کہ چین کے چینگ ای 8 مشن کے ساتھ چاند پر پاکستان کا پہلا روور بھیجا جائے گا۔
اس روور کا وزن لگ بھگ 35 کلوگرام ہوگا اور چینی مشن کے ساتھ یہ چاند کے قطب جنوبی پر لینڈ کرے گا۔
چینگ ای 8 مشن کو چین کے اسپیس سینٹر سے روانہ کیا جائے گا اور اس کی کامیابی کی صورت میں پاکستان چاند کی سطح پر روور بھیجنے والا چھٹا ملک بن جائے گا۔
اب سپارکو کی جانب سے اس روور کا نام رکھنے کے لیے ایک ملک گیر مقابلے کا اعلان کیا گیا ہے۔