کراچی (آئی آر کے نیوز): پیٹرولیم ڈیلرز نے ڈی ریگولیشن کی صورت میں پیٹرول پمپس بند کرنے کی دھمکی دیدی۔
کراچی میں پاکستان پٹرولیم ڈیلرز ایسوسی ایشن کے چیئرمین عبد السمیع خان نے ملک خدا بخش ودیگر کے ہمراہ پریس کانفرنس کرتے ہوئے کہا کہ ہماری صنعت تباہی کے دہانے پر ہے، وزیر پٹرولیم یہ سمجھتے ہی نہیں کہ پٹرولیم انڈسٹری ہوتی کیا ہے، حکومت قابل لوگوں کو آگے لائے۔
انہوں نے کہا کہ حکومت تین سال سے پٹرولیم صنعت ڈی ریگولیشن کی کوشش کررہی تھی ہم نے مزاحمت کی، جب ہم نے ہڑتال کی تو مجھے دھمکایا بھی گیا تاہم بعد میں حکومت نے کہا کہ ڈی ریگولیشن کیلئے آپ سے مشورہ لیں گے۔
عبدالسمیع خان نے کہا کہ ڈی ریگولیشن کی وجہ سے اسمگلڈ مصنوعات کی آمد میں اضافہ ہوگا، صنعت تو تباہ ہوگی وہیں گاڑیوں کے انجن بھی خراب ہو جائیں گے کیونکہ اسمگلڈ تیل ریفائینڈ نہیں ہوتا۔
انکا کہنا تھا کہ ڈی ریگولیشن میں یورپ اور امریکا کی مثالیں دی جاتی ہیں، ان کے کاروباری مضمرات مختلف ہیں ہم نے وزیر پٹرولیم کو خط بھی ارسال کیا ہے، ہم چاہتے ہیں کہ ڈی ریگولیشن نہیں ہونی چاہیے، بصورت دیگر ہم پٹرول پمپ بند کرنے پر مجبور ہو جائیں گے۔