فخر زمان کا جلد ریٹائرمنٹ لینے کا امکان: میڈیا رپورٹس

 

لاہور (آئی آر کے نیوز): قومی کرکٹ ٹیم کے جارح مزاج اوپننگ بلے باز فخر زمان کا ون ڈے کرکٹ سے جلد ریٹائرمنٹ لینے کا امکان ہے۔

تفصیلات کے مطابق اس حوالے سے میڈیا پر مختلف رپورٹس زیرِ گردش ہیں۔ سماء ٹی وی پر شائع رپورٹ میں دعویٰ کیا گیا ہے کہ ریٹائرمنٹ لینے کے سلسلے میں فخر زمان نے کچھ عرصہ قبل قریبی لوگوں سے مشاورت بھی کی تھی۔

رپورٹ میں بتایا گیا کہ فخر زمان کی جانب سے مؤقف اپنایا گیا کہ چیمپئنز ٹرافی میرا آخری آئی سی سی ٹورنامنٹ ہوگا، ون ڈے کرکٹ سے بریک لینا چاہتا ہوں۔

دوسری جانب، میڈیا رپورٹس میں یہ دعویٰ کیا جارہا ہے کہ فخر زمان ہائپر تھائراڈازم کی بیماری سے تاحال صحت یاب نہ ہوسکے، فخر زمان ہر طرز کی کرکٹ سے تقریباً اڑھائی مہینے کے لئے دور ہوچکے ہیں، ڈاکٹرز نے فخر زمان کو اڑھائی ماہ کا آرام دیا ہے۔

یہاں یہ بھی واضح رہے کہ فخر زمان 86 ون ڈے میچز میں پاکستان کی نمائندگی کرچکے ہیں۔ فخر زمان حال ہی میں چیمپئنز ٹرافی میں انجری کے باعث ٹورنامنٹ سے آوٹ ہوگئے تھے۔

 

میڈیا رپورٹس میں دعویٰ کیا گیا کہ فخر زمان لیگز پر این او سی کے معاملے اور قومی ٹیم کی سلیکشن پر بھی دلبرداشتہ ہوئے تھے۔ فخر زمان اپنے اہل خانہ کو بھی بیرون ملک منتقل کرنے کی سوچ رکھتے ہیں۔