لاہور (آئی آر کے نیوز): وزیر اعلیٰ پنجاب مریم نواز شریف نے صوبے میں ’مریم نواز کمیونٹی ہیلتھ سروسز‘ متعارف کروانے کا فیصلہ کرلیا۔
تفصیلات کے مطابق ’مریم نواز کمیونٹی ہیلتھ سروسز‘ شعبہ صحت کے 19 اہم ٹاسک پورے کرے گی۔
ایک اجلاس میں بتایا گیا کہ 39 ہزار لیڈی ہیلتھ ورکرز ’مریم نواز کمیونٹی ہیلتھ سروسز‘ فورس کا حصہ ہوں گی اور یہ ورک فورس مجموعی طور پر تقریباً 60 ہزار سے زائد ارکان پر مشتمل ہوگی۔
مریم نواز کمیونٹی ہیلتھ سروسز پولیو سمیت دیگر ویکسی نیشن کے ذمہ دار ہوگی جبکہ اس کے ذریعے مریضوں کا مستند ریکارڈ مرتب کیا جائے گا۔
بریفنگ میں بتایا گیا کہ مریم نواز کمیونٹی ہیلتھ سروسز سے میپنگ کا ٹاسک بھی پورا کیا جائے گا، موجودہ صحت کی سہولیات سے 47 فیصد آبادی کورڈ اور 53 فیصد ان کورڈ ہے، جبکہ 93 فیصد مریض ہیلتھ سروسز سے متعلق اصلاحات سے مطمئن ہیں۔
وزیر اعلیٰ مریم نواز شریف نے کمیونٹی ہیلتھ سروسز سے متعلق جامع پلان طلب کرلیا ہے اور کمیونٹی ہیلتھ سروسز کو فنکشنل کرنے کے لیے فوری اقدامات کا حکم دے دیا۔
مریم نواز کمیونٹی ہیلتھ سروسز کے ذریعے صحت سے متعلق امور پر مربوط ٹاسک پورے کیے جائیں گے اور پنجاب بھر میں آؤٹ سروسنگ کے ذریعے مزید 20 ہزار ہیلتھ انسپکٹرز کی خدمات حاصل کی جائیں گی، جبکہ لیڈی ہیلتھ ورکرز پروگرام کو بھی اس سے منسلک کر دیا جائے گا۔